Rüstəmova Həcər Ağasalah qızı Cəlilabad rayonunun ən yaşlı sakinlərindən biridir. O, Seyidbazar kəndində yaşayır. 101 yaşlı ağbirçəyin 7 övladı, 30 nəvəsi, 58 nəticəsi var. Həmişə olduğu kimi, bu gün də bu ahıl yaşında məsuliyyətlidir. O, 71 saylı Cəlilabad şəhər seçki dairəsinin 23 saylı Seyidbazar seçki məntəqəsi üzrə qeydiyyata alınıb. Həcər nənə səhhətində olan problemə görə məntəqəyə gedə bilmədiyini, seçkidə səs verə bilmək üçün evə daşınan seçki qutusunun gətirilməsi ilə bağlı müraciət etdiyini bildirərək, konstitusion hüququndan istifadə edərək səs verib.
Sonda ona bu şəraiti yaradanlara minnətdarlığını bildirən Həcər nənə deyib: “Sağ olun ki, məni yaddan çıxarmamısınız. Arzum budur ki, yumruq tək birləşib, daim dövlətçiliyimizə sadiq olaq. Allah ölkəmizdəki bu əmin-amanlığı, sabitliyi daimi etsin”.
