Ehtiyatsızlıqdan baş verən dəhşətli hadisə nəticəsində üç körpənin valideyn qayğısından məhrum qalması ilə bağlı bu gün məlumat vermişdik. Bədbəxt hadisə ilə üzləşən ailənin üç övladının ata qayğısından məhrum olmaması üçün hər iki tərəf aidiyyəti qurumlara müraciət edib.
Təqsirləndirilən şəxsin, anasının, qardaşının fikirlərini bölüşdükləri videosüjeti artıq izləmisiniz.
Cenubtv.az oxu.az-a istinadən bildirir ki Oxu.Az-ın əməkdaşına ehtiyatsızlıqdan törədilən cinayətin qurbanı olan Pərvanə Əhmədovanın anası Mətanət Quliyeva da nəvələrinin atasız böyüməsini istəmədiyini deyir:
“Onlar çox gözəl ailə olublar. O, gözəl insan olmasa, mən heç bu işin ardınca da düşməzdim. Anadan onsuz da yetim qalıblar, heç olmasa, atadan ayrı qalmasınlar. 30 may 2021-ci ildə, həftənin 6-cı günü belə bir hadisə baş verib. Hadisədən qabaq mənimlə danışıb, hal-əhval tutmuşdu. Hər şey qaydasında idi. Mənə dedi ki, pandemiyadır, evə tez gedim. Nigaran qalırdı məndən. Çox gözəl övlad, ana, həyat yoldaşı idi.
Hamı bilir, mən də bilirəm ki, hadisə ehtiyatsızlıq səbəbindən baş verib. Balanın yaxşı olmağı ananın fəxr yeridir. Pərvanə mənim böyük övladım olub, onunla həmişə fəxr etmişəm. Yoldaşı da çox gözəl inşandır, ailəsi üçün də gözəl ailə başçısı olub. Allah heç bir anaya belə bala dərdi göstərməsin. Ondan başqa mənim iki qızım, bir oğlum da var.
Bizim Fəqandan (Pərvanənin həyat yoldaşı Fəqan Əhmədov – red.) heç bir şikayətimiz yoxdur, istəyirik ki, gəlsin, balalarının üstündə dursun. Yenə gəlsə, mənim ona hörmətim var. Qısqanclıq olmayıb, problem, narahatlıq olmayıb. Fəqan çox gözəl ailə başçısı olub, Allah yolunu açsın”.
