Türkiyədə məktəblilərə atəş açan şəxs barədə şok detallar açıqlandı
Read Time:1 Minute, 33 Second
Türkiyənin Manisa bölgəsində lisey yaxınlığında silahlı hücumda şübhəli bilinərək saxlanılan şəxs, hadisədən təxminən bir ay əvvəl qohumlarına atışma törətmək niyyətindən danışıb, patronları isə nənəsindən aldığı pulla əldə edib.
Cenubtv.Az xəbər verir ki, bu barədə “Sabah” qəzeti məlumat yayıb.
Nəşrin istintaq materiallarına istinadən yaydığı xəbərə əsasən, dəhşətli hadisəni törədən məktəbli marksizm ideologiyasına maraq göstərib və qatil haqqında çəkilən serialın pərəstişkarı olub.
Qeyd olunur ki, hazırda saxlanılanların sayı doqquza çatıb. Cinayəti həyata keçirən şəxsdən başqa, onun atası, anası, babası, nənəsi, üç əmisi oğlu və patronların alındığı ehtimal edilən ov ləvazimatları mağazasının sahibi də yaxalanıb.
İstintaq müəyyən edib ki, hücumdan təqribən bir ay əvvəl şübhəli şəxs əmioğlularından birinə silahlı hücum etmək planı barədə məlumat verib, lakin qohumu bunu zarafat kimi qəbul edib.
Həmçinin iddia olunur ki, insidentdən əvvəl yeniyetmə digər iki qohumu ilə birlikdə atıcılıq məşqləri edib.
Hüquq-mühafizə orqanları silah və sursatın mənbəyini araşdırır. İş materiallarına əsasən, yeniyetmə nənəsindən 600 türk lirəsi (təxminən 20 manat) alaraq ov malları mağazasından patronlar alıb. Cinayətdə istifadə olunan ov tüfənginin nənənin adına qeydiyyatda olduğu və babanın evində saxlanıldığı bildirilir.
Axtarışlar zamanı müstəntiqlər tərəfindən müxtəlif qeydlər və digər materiallar aşkar edilib. Nəşrin məlumatına görə, bu tapıntılar yeniyetmənin “Sosialist Kommunist Partiyası” adlı uydurma bir struktur yaratdığını, sosial problemlər haqqında yazılar yazdığını və manifestə bənzər bir mətn hazırladığını göstərir. Onun otağında həmçinin nasist simvolikası, britaniyalı marksist tarixçi Erik Hobsbaumun əsərlərinə marağını sübut edən məlumatlar və “Netflix”in silsilə qətllər törədən “Co Qoldberq” obrazından təsirləndiyini göstərən qeydlər tapılıb.
Qeyd olunur ki, şübhəlinin mobil telefonu mütəxəssislər tərəfindən araşdırılır.
Qəzetin yazdığına görə, dəqiqləşdirilmiş məlumatlar göstərir ki, məktəbli atəşi təhsil müəssisəsinin binasında və ya girişində deyil, şagirdlərin dərsə getdiyi marşrut üzərində açıb. Məktəbdən təxminən 80, 90 və 100 metr məsafədə üç dəfə atəş açılıb. Nəticədə 11 şagird xəsarət alıb ki, onlardan üçünün vəziyyəti ağırdır. Hücumun motivi hələlik rəsmi olaraq müəyyənləşdirilməyib. Prokurorluq həmçinin yeniyetmənin həmyaşıdları tərəfindən qısnamaya məruz qala biləcəyi ilə bağlı iddiaları da yoxlayır.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0
Average Rating