Cəlilabadda şəhid Rəfail İşiyevin yaşadığı binada barelyefin açılışı olub
Bu gün Azərbaycan Respublikasının ərazi bütövlüyü uğrunda gedən döyüşlərdə qəhrəmancasına şəhid olan Rəfail İşiyevin yaşadığı binada barelyefin açılış mərasimi keçirilib.
Mərasimdə rayon icra hakimiyyətinin başçısı Rafiq Cəlilov, aparatın məsul şəxsləri, hüquq-mühafizə orqanları, rayon ictimaiyyətinin nümayəndələri və şəhidin ailə üzvləri iştirak ediblər.
Rayon icra hakimiyyətinin başçısı Rafiq Cəlilov çıxış edərək bildirib ki, şəhid Rəfail İşiyev torpaqlarımızın azadlığı uğrunda son damla qanına kimi vuruşaraq qəhrəmancasına şəhid olub: “Şəhidlər qanları, canları ilə xalqımıza Qələbə sevincini yaşatdılar. Bizlər onlara hər zaman borcluyuq. Şəhidlər hər zaman xalqımızın qəlbində yaşayacaqdır. Azərbaycanda şəhid ailələri Ali Baş Komandan Cənab İlham Əliyevin diqqət və qayğısı ilə əhatə olunub”.
Sonra Rəfail İşiyevin yaşadığı binaya vurulmuş barelyefin üzərindən ağ örtük götürülüb.
Çıxış edənlər şəhidin mənalı həyatından və qəhrəmanlıq nümunəsi olan döyüş yolundan danışıblar. Bildirilib ki, Rəfail İşiyev döyüşlərdə göstərdiyi şücaətə görə Azərbaycan Respublikası Prezidentinin Sərəncamı ilə ölümündən sonra “Vətən uğrunda” medalı, “Şuşanın azad olunmasına görə” medalı, “Xocavəndin azad olunmasına görə” medalı “İgidliyə görə” medalı, “Füzulinin azad olunmasına görə” medalı və “Cəbrayılın azad olunmasına görə” medalı ilə təltif edilib.
Şəhidin ailəsi onlara göstərilən diqqət və qayğıya görə ölkə rəhbərinə minnətdarlıqlarını bildiriblər.
Mərasim məktəblilərin ifasında vətənpərvərlik mövzusunda şeirlərlə davam edib.
